।। रंगा री बौछार रळियाणी ।।
सुर रंग वाचा सरसती ,
गहरो रंग गुणेस ।
ऋतू रमे रळियामणी ,
वसुधा नवले वेस ।(1)
पतझड़ आई प्रामणी ,
कळियां करती केल ।
नवल छटा धर निरखती ,
आतुर भाव उछेल । 2
आई ज ऋतु उंमगरी ,
रमती फागण रंग ।
जोवन छटा चंग जमी ,
होळी रो हुड़दंग । 3
उल्लास भर उंमगतणो ,
गहर रमे गणगौर ।
रंग विभा वसुधा रची ,
छेड़ छटा चहुंछौर ।4
प्रभा वसुधा परसती ,
फरके पतियां फूल ।
ओढ रंगीली ओढणी ,
झाड़ झकोळे झूल ।5
सुर रंग राचण सांतरो ,
उमंग भरण उल्लास ।
अम्ब रंग आतुर अती ,
वसुधा रमण विल्लास ।6
।। रंगोली छंद नांराच ।।
रमे विल्लास रंग रास हास वास हामळे ।
करे किलोळ रंग ढोळ जंग रंग जांमळे ।
रमां उमंग अंग अंग रास रंग राम रा।
रचे सुचंग भाव अंग पेख रंग प्रेम रा ।
जियो पसार रंग प्रेमरा ।1
खिले खुसाल डाळ डाळ पेड़ फूल पांत रा ।
अनेक रंग राच संग भाव भांत भांत रा ।
चिमे रसाळ चोळ माळ मोह जाळ मान रा ।
रचे सुचंग भाव अंग पेख रंग प्रेम रा ।
जियो पसार रंग प्रेम रा ।2
रमे रसाल डाळ झाल वेग डाक वांद रा ।
कपोल कोड होड होड करे टकोळ कंदरा ।
सखी गुलाल संग साज उछेल भाव अंग रा ।
रचे सुचंग भाव अंग पेख रंग प्रेम रा ।
जियो पसार रंग प्रेम रा ।3
विभा उलेड़ के धरा उकेर रंग आखती ।
छटा बिखेर पेड़ मेर छाप भोर छापती ।
रती जगाड़ जीव जंत भाव मन्न भांत रा ।
रचे सुचंग भाव अंग पेख रंग प्रेम रा ।
जियो पसार रंग प्रेम रा ।4
मनां सुढाल रंग ढाल रास नाल राचवा ।
दिलां खंखाळ दंभ ढाळ प्रीत बांध पाळवा ,
अंबीर छेल मांड खेल मेळ साख मान रा ।
रचे सुचंग भाव अंग पेख रंग प्रेम रा ।
जियो पसार रंग प्रेम रा ।5
।। छप्पय ।।
झाड़ण काळ जंजाळ , हरस मन में हरसावे ।
होळी रो हुड़दंग , दिलां उलास दरसावे ।
सज्जन रस सरसाय , रंग रामत रचवावे ।
अंतर भाव अरसाय , आदर रीत उकलावे ।
आदर उमंग उल्लास अती , पवन प्रकास परवरे ।
परघळ रंस रस प्रीत तणो , सुमती दिलपर सरवरे ।
आम्बदान जवाहरदान देवल चारण आलमसर ।
कोई टिप्पणी नहीं:
एक टिप्पणी भेजें